ჩელსის ნახევარმცველის, ფრენკ ლამპარდის მოსაზრებით, ინგლისის ნაკრების თავკაც ფაბიო კაპელოს მომავალი მატჩისთვის, გუნდის თავდამსხმელებს - ემილ ჰესკისა და ჯერმეინ დეფოს - შორის არჩევანის გაკეთება გაუჭირდება. როგორც ცნობილია, 2010 წლის მსოფლიოს ჩემპიონატის შესარჩევი ციკლის მატჩში, რომელიც ოთხშაბათს შედგება, ინგლისელთა მეტოქე ხორვატიის ეროვნული გუნდი იქნება. “ორივე ფორვარდი ჩინებულ თამაშს აჩვენებს და ინგლისის ნაკრების ძირითად შემადგენლობაში ადგილს იმსახურებს. ყველაფერი კაპელოს არჩევანზე იქნება დამოკიდებული. დარწმუნებული ვარ, ის შეცდომას არ დაუშვებს და მართებულ გადაწყვეტილებას მიიღებს. დიდი ხანია დეფოს ვიცნობ. ის მიზანსწრაფული ფეხბურთელი და ნამდვილი სნაიპერია. ჰესკი უკვე საკმაო ხანია, რაც ეროვნულ გუნდში ასპარეზობს და სამწვრთნელო შტაბისგან ასევე იმსახურებს ნდობას. ამ ფორვარდების სათამაშო სტილი ერთმანეთისგან განსხვავდება. ვნახოთ, რომელ მათგანს მიანიჭებს კაპელო უპირატესობას”, - ავრცელებს “არისტოკრატთა” ნახევარმცველის კომენტარს ფიფას ოფიციალური ვებგვერდი.
|