ინგლისური “მანჩესტერ იუნაიტედის” მთავარი მწვრთნელი ალექს ფერგიუსონი, პოზიტიურად აფასებს უეფას ინიციატივას, რომელიც მატჩის მსვლელობისას ორივე კარს უკან თითო დამატებითი არბიტრის გამოყენებაში მდგომარეობს.
“ეს საინტერესოა. მაგალითად, კონტრშეტევის დროს, მსაჯი ყოველთვის ვერ ასწრებს თანამედროვე ფეხბურთელების გაყოლას. როგორც კი თამაში საჯარიმო მოედანში გადადის, მას დამხმარედ სხვა მსაჯი გამოუჩნდება. ეს მთავარი არბიტრისთვის ნამდვილად სასარგებლო იქნება. ხანგრძლივი დროის განმავლობაში განვიხილავთ უახლესი ტექნოლოგიების გამოყენებას იმის დასადგენად, გადაკვეთა თუ არა ბურთმა კარის ხაზი, ან რა დროს უნდა დაინიშნოს პენალტი. ამ თვალსაზრისით პროგრესი იგრძნობა. ვთვლი, რომ ცდა ნამდვილად ღირს”, - ავრცელებს ფერგიუსონის კომენტარს უეფას ოფიციალური ვებგვერდი.
|