ფიფას ხელმძღვანელებმა ლონდონის "ჩელსის" კიდევ უფრო გაუმკაცრეს სასჯელი - მსოფლიო ფეხბურთის ხელმძღვანელთა გადაწყვეტილებით, სეზონის დასრულებამდე "არისტოკრატებს" იმ ფეხბურთელთა დაბრუნებაც აეკრძალათ, რომლებიც საიჯარო ხელშეკრულებით ჰყავთ გასხვისებული.
შეგახსენებთ, რომ ცოტა ხნის წინ ფიფამ "ჩელსის" მიერ "ლანსიდან" გაელ კაკუტას გადაბირების დეტალები შეისწავლა და ტრანსფერში სერიოზული დარღვევები აღმოაჩინა, რის გამოც ლონდონელებს უახლოესი ორი სატრანსფერო ფანჯრის პერიოდში (2010 წლის იანვარსა და ზაფხულში) ფეხბურთელთა შეძენა აუკრძალა. ახლა კი, "სტემფორ ბრიჯის" ბინადრებს იჯარით გაშვებული საკუთარი მოთამაშეების ვადაზე ადრე დაბრუნების უფლებაც წაართვეს. აღსანიშნავია, რომ "ჩელსის" ხელმძღვანელებს ჯერ კიდევ აქვთ აპელაციის შეტანის შესაძლებლობა. თუმცა, ნაკლებად სავარაუდოა, რომ ფიფამ საკუთარი გადაწყვეტილება შეცდომად აღიაროს და ინგლისურ გრანდს აკრძალვა მოუხსნას. ერთადერთი, რისი იმედიც შესაძლოა ლონდონელებს ჰქონდეთ, სასჯელის შემსუბუქებაა. არ არის გამორიცხული, რომ აპელაციის შეტანის შემთხვევაში, "არისტოკრატებმა" სატრანსფერო დისკვალიფიკაციის ვადის შემცირებას მიაღწიონ და ზაფხულისთვის ფეხბურთელთა ბაზარზე ვაჭრობის უფლება დაიბრუნონ. თუმცა, "ჩელსი" ფიფას მაღალჩინოსანთა გადაწყვეტილების ოფიციალურად გასაჩივრებას ჯერ არ ჩქარობს. არადა, ლონდონელებს აპელაციის შეტანის ვადა მხოლოდ მიმდინარე თვის ბოლომდე აქვთ.
|