ინგლისური “ბოლტონის” ნახევარმცველმა შონ დევისმა, შესაძლოა, ნახევარი წლის განმავლობაში ვეღარ შეძლოს თამაში. სააგენტო AP-ი იუწყება, რომ დევისს ქირურგიული ჩარევა ესაჭიროება. ფეხბურთელმა მარჯვენა ფეხის მუხლი, 29 აგვისტოს, “ლივერპულთან”, ინგლისის ჩემპიონატის შეხვედრაში დაიზიანა, თუმცა აქამდე ექიმები მის გამოჯანმრთელებას ოპერაციის გარეშე ცდილობდნენ, რამაც შედეგი არ გამოიღო. “შონის მინდორზე დაბრუნების ზუსტ ვადას ჯერჯერობით ვერ დავასახელებთ. ის იმდენ ხანს დაისვენებს, რამდენიც საჭირო იქნება სრული გამოჯანმრთელებისთვის”, - აცხადებს “ბოლტონის” მთავარი მწვრთნელი გარი მეგსონი. დევისი “ბოლტონში” გასულ ზაფხულს “პორტსმუთიდან” გადავიდა და ახალი კლუბის შემადგენლობაში აქამდე მხოლოდ 3 მატჩის ჩატარება მოასწრო.
|