"მანჩესტერ იუნაიტედის" მთავარი მწვრთნელის სერ ალექს ფერგიუსონის განცხადებით, შაბათს, "სტოკის" წინააღმდეგ გასამართ მატჩში "მანცესტერის" კარს კვლავ ბენ ფოსტერი დაიცავს. შეგახსენებთ, რომ ფოსტერი დიდი კრიტიკის ქვეშ მოექცა მანჩესტერული დერბის შემდეგ. 26 წლის ინგლისელმა მეკარემ პირველი გოლი "სიტის" ფაქტობრივად აჩუქა. მომენტები, რომელშიც ბენი საკუთარ გუნდს დაეხმარა, თითქმის არ ყოფილა.
ოთხშაბათს "ვულვერჰემპტონის" წინააღმდეგ გამართულ მატჩში კი ფერგიუსონმა კარის დაცვა ტომას კუშჩაკს ანდო. პოლონელს საქმე თითქმის არ ჰქონია, მაგრამ თავისი ავტორიტეტი მან მაინც დაიცვა. მოსალოდნელი იყო რომ მწვრთნელი არჩევანს "სტოკის" წინააღმდეგ გასამართ მატჩში კვლავ კუშჩაკზე შეაჩერებდა, თუმცა მან ფოსტერის გამოყვანის გადაწყვეტილება მიიღო.
"ოთხშაბათს გამართული მატჩი შესანიშნავი იყო ტომასისათვის სათამაშო პრაქტიკის დასაგროვებლად, მაგრამ ხვალ ჩვენს კარს კვლავ ბენი დაიცავს. ბენს დიდი სათამაშო გამოცდილება არ აქვს, მაგრამ ის სრულ მზადყოფნაშია" - აცხადებს ფერგიუსონი The Guardian-თან.
აქვე დავამატებ, რომ ინგლისის ჩემპიონთა კარის ძირითადი დარაჯი ედვინ ვან დერ სარი კვლავ ლაზარეთში იმყოფება. როგორც ფერგიუსონმა განაცხადა, ჰოლანდიელ მეკარეს სრული გამოჯანმრთელებისათვის კიდევ 3 კვირა დასჭირდება და სწორედ 3 კვირის მერე განაახლებს ვარჯიშებს ედვინი.