საქართველოს ფეხბურთელთა ეროვნული ნაკრების მცველმა ზურაბ ხიზანიშვილმა, რომელმაც მიმდინარე სეზონი ინგლისის პრემიერლიგის “ბლექბერნში” დაიწყო, სამთვიანი საიჯარო ხელშეკრულება ჩემპიონლიგაში მოასპარეზე “ნიუკასლთან” გააფორმა.

ამის შესახებ, “ნიუკასლის” ოფიციალური ვებ-გვერდი იუწყება.


მიმდინარე სეზონში, ხიზანიშვილმა “ბლექბერნის” რიგებში მხოლოდ ერთი მატჩი ჩაატარა და მოედანზე გასვლა ინგლისის ლიგის თასზე “ჯილინგემთან” 3:1 მოგებულ შეხვედრაში მოუწია. აქედან გამომდინარე, “ბლექბერნის” ხელმძღვანელობას ქართველი მცველისთვის სხვა კლუბში კარიერის გაგრძელებაში ხელი არ შეუშლია.


აღსანიშნავია, რომ “ნიუკასლის” გარდა, ხიზანიშვილის საკუთარ რიგებში ხილვა, “მიდლსბროსა” და “ვესტ ბრომვიჩსაც” სურდათ, მაგრამ საბოლოო ჯამში, ყველას “კაჭკაჭებმა” აჯობეს.


“ხიზანიშვილი გამოცდილი მცველია და მოხარული ვართ, რომ ის ჩვენს რიგებში ითამაშებს. ზურა ინგლისურ ფეხბურთს კარგად იცნობს და უახლოეს თვეებში გუნდის შემადგენლობას მნიშვნელოვნად გააძლიერებს” –განაცხადა “ნიუკასლის” მთავარმა მწვრთნელმა ირლანდიელმა კრის ჰიუტონმა.
მოსალოდნელია, რომ ხიზანიშვილის დებიუტი, უახლოეს შაბათს, ჩემპიონლიგის მერვე ტურში, “სენტ ჯეიმს პარკზე”, “პლიმუტის” წინააღმდეგ შედგება.


“ნიუკასლს”, რომელმაც პრემიერლიგა გასულ სეზონში დატოვა, დღესდღეობით, სატურნირო ცხრილში 16 ქულით მესამე ადგილი უკავია...


ამრიგად, თემურ ქეცბაიას შემდეგ, რომელიც “ნიუკასლში” 1997-2000 წლებში გამოდიოდა, ხიზანიშვილი მეორე ქართველი ფეხბურთელია, რომელსაც “კაჭკაჭების” რიგებში თამაში მოუწევს.