ლონდონის “ჩელსი” ზოგიერთი საინფორმაციო საშუალების წინააღმდეგ სასამართლოში ჩივილს აპირებს.
კლუბის ოფიციალური ვებგვერდი იუწყება, რომ ცოტა ხნის წინათ, მასმედიამ გაავრცელა ინფორმაცია, თითქოს “არისტოკრატთა” კოტ დ’ივუარელი ფორვარდის, სალომონ კალუს დაბადების დღეზე, მან და მისმა თანაგუნდელებმა მხოლოდ ალკოჰოლურ სასმელებში 120 ათასი გირვანქა დახარჯეს, რაც სიმართლეს არ შეესაბამება.
“პრესაში გავრცელებული ცნობის თანახმად, ოთხშაბათს, სალომონ კალუს დაბადების დღეზე მყოფმა “ჩელსის” მოთამაშეებმა, 120 ათასი გირვანქა დახარჯეს ალკოჰოლურ სასმელებში. კლუბი და ფეხბურთელები ამ მონაცემს კატეგორიულად უარყოფენ. “ჩელსის” მოთამაშეთაგან არავის დაუხარჯავს ამხელა თანხა. მიუხედავად იმისა, რომ არაერთმა ფეხბურთელმა მიულოცა თანაგუნდელს დაბადების დღე, ამ ღონისძიების საფასური, ძირითადად, სალომონის უახლოესმა მეგობრებმა დაფარეს და თვით ამის გათვალისწინებითაც კი, დახარჯული თანხის ოდენობა ძალიან შორსაა იმ რიცხვისგან, რომელიც მასმედიამ გაავრცელა. ამ მომენტში, კლუბი კონსულტაციებს გადის თავის იურისტებთან და სრულიად განსაზღვრულად, “ჩელსიც” და ფეხბურთელებიც იმ გამოცემების წინააღმდეგ, რომლებმაც ეს ცნობა გაავრცელეს, სარჩელს აღძრავენ”, - ნათქვამია “არისტოკრატთა” განცხადებაში.