“მანჩესტერ იუნაიტედის” მცველი რიო ფერდინანდი გუნდს ერთი თვე ვერ დაეხმარება.
ინგლისური გრანდის ოფიციალური ვებგვერდი იუწყება, რომ გასულ კვირაში მან ბარძაყის ტრავმა ვარჯიშის დროს მიიღო. ფერდინანდის არყოფნამ უკვე უარყოფითად იმოქმედა “მანჩესტერის” ასპარეზობაზე, რაც ყველაზე მძაფრად “ბარნლისთან” შეხვედრისას (0:1) გამოვლინდა. ფერგიუსონის გუნდს მომდევნო ტურში “უიგანთან” დაპირისპირება მოუწევს. “ამჟამად, ჩვენი მდგომარეობა უკვე არც ისეთი სავალალოა, როგორც ეს ოთხშაბათს იყო. ვიმედოვნებთ, რომ მომავალი ტურისთვის მზად იქნება ვიდიჩი, რომელიც დაცვაში ერთ-ერთ პოზიციას დაკეტავს. ასევე შესაძლებელია, რომ მოედანზე გამოვიდეს გარი ნევილიც, რომლის გამოცდილებაც ძალიან გამოადგება გუნდს “ბარნლთან” მარცხის შემდეგ. რაც შეეხება რიოს, ის სამიდან ოთხ კვირამდე დაისვენებს”, - დასძინა ალექს ფერგიუსონმა.
|