ინგლისის ფეხბურთის ასოციაციის (FA) სამსაჯო კომიტეტის თავკაცმა კეიტ ჰაკეტმა არბიტრ მარტინ ატკინსონის გადაწყვეტილება გაამართლა, რაც პრემიერლიგის ბოლო ტურში, “მანჩესტერ იუნაიტედსა” და “სიტის” შეხვედრის უჩვეულოდ დიდხანს გაგრძელებაში გამოიხატა. როგორც ცნობილია, “მანჩესტერის” ფორვარდმა მაიკლ ოუენმა გამარჯვების გოლი (4:3) დამატებითი მე-6 წუთის 25-ე წამზე გაიტანა, მაშინ როდესაც ძირითადი 90 წუთის გასვლის შემდეგ, ატკინსონმა სათამაშო დრო მხოლოდ 4 წუთით გაზარდა. პაექრობის შემდეგ “სიტის” მთავარმა მწვრთნელმა მარკ ჰიუზმა ამ გარემოების გამო ღიად გამოხატა უკმაყოფილება, თუმცა ჰაკეტმა ატკინსონის მხარე დაიჭირა. “თამაშის წესების თანახმად, მხოლოდ მსაჯი აკონტროლებს დროს. როდესაც კომპენსირებული დროის ამსახველ ტაბლოს გვაჩვენებენ, ეს იმ წუთების მინიმალური რაოდენობაა, რომელიც გუნდებმა ძირითადი დროის გასვლის შემდეგ უნდა ითამაშონ. ხოლო თუ ამ დროს თამაში შეჩერდება, მსაჯს კიდევ აქვს დროის დამატების უფლება. სტატისტიკა გავაანალიზეთ, ჩანაწერი ვნახეთ და მივედით დასკვნამდე, რომ არბიტრი სწორად იქცეოდა”, - ავრცელებს ჰაკეტის კომენტარს The Guardian-ი.
|