"პორტსმუთის" ხელმძღვანელობა "ლიონს" 30 წლის ფორვარდის, ფრედერიკ პიკიონის ერთწლიან იჯარაზე შეუთანხმდა. ამასთან, ხელშეკრულების ვადის ამოწურვის შემდეგ, ინგლისურ კლუბს თავდამსხმელის სრულად გამოსყიდვის უფლება ექნება. ფიფას ოფიციალური ვებ-გვერდის ინფორმაციით, პორტსმუთელები პიკიონს "ტოტენჰემში" გადასული პიტერ კრაუჩის შემცვლელად მოიაზრებენ.
პიკიონი "ლიონმა" ერთი წლის წინ "მონაკოდან" 3.8 მილიონ ფუნტად შეიძინა, თუმცა თავდამსხმელმა გუნდის შემადგენლობაში დამკვიდრება ვერ მოახერხა. სეზონის განმავლობაში მან ლიონელთა შემადგენლობაში 19 მატჩი გამართა და ფორვარდისთვის შეუფერებელ, მხოლოდ 2 გოლს მოუყარა თავი. კარიერის განმავლობაში იგი "ნიმის" (2000-01 წლები, 8 მატჩი 3 გოლი), "რენის" (2001-04, 83, 18), "სტ. ეტიენისა" (2004-07, 91, 23), "მონაკოს" (2007-08, 46, 12) ღირსებას იცავდა.
პიკიონს ერთი მატჩი საფრანგეთის ეროვნულ გუნდშიც აქვს ნათამაშები - 2007 წელს ავსტრიელთა წინააღმდეგ ამხანაგურ შეხვედრაში ითამაშა.