მადრიდის “ატლეტიკოს” ხელმძღვანელობა აცხადებს, რომ ფორვარდ სერხიო აგუეროს იმ შემთხვევაშიც კი არ შეელევა, თუ მისი მსურველი კლუბი 60 მილიონი ევროს გადახდაზე თანახმა იქნება.
Sky Sports-ის ინფორმაციით, ინგლისის “მანჩესტერ იუნაიტედის” მთავარი მწვრთნელი სერ ალექს ფერგიუსონი, არგენტინელს მადრიდის “რეალში” გადასული კრიშტიანუ რონალდუს შესაძლო შემცვლელად მიიჩნევდა და 21 წლის თავდამსხმელის მიმამრთ, ინტერესს მილანის “ინტერი” და ლონდონის “ჩელსიც” იჩენდა.
“60 მილიონი ევროც რომ შემოგვთავაზონ, სერხიო აგუეროს გაყიდვას არ დავთანხმდებით. ის აუცილებლად ჩვენთან დარჩება” – განაცხადა “ატლეტიკოს” პრეზიდენტმა ენრიკე სერესომ.
აგუერო მადრიდულ კლუბში 2006 წელს გადავიდა და ესპანეთის პრიმერადივიზიონის 112 მატჩში 42 გოლი გაიტანა. სხვადასხვა დროს, აგუეროს საკუთარი ქვეყნის 20-წლამდელთა (7 თამაში, 6 გოლი), 23-წლამდელთა (5 შეხვედრა, 2 გოლი) და ეროვნულ ნაკრებში (18 შეხვედრა, 6 გოლი) უთამაშია.
2005 და 2007 წლებში, მან 20-წლამდელთა ნაკრებებს შორის მსოფლიოს ჩემპიონის ტიტული მოიპოვა, 2008 წელს კი, საკუთარი ქვეყნის 23-წლამდე ნაკრებთან ერთად ზაფხულის ოლიმპიადის ოქროს მედალი მოიგო.