"ჩელსის" იტალიელი თავკაცის, კარლო ანჩელოტის თქმით, გუნდმა ფეხბურთელთა ყიდვა-გაყიდვის პროცესი დაასრულა და მიმდინარე ზაფხულში შემადგენლობაში კორექტივების შეტანას აღარ აპირებს. შეგახსენებთ, რომ სატრანსფერო პერიოდში "არისტოკრატებმა" სამი ფეხბურთელი დაიმატეს: 18 მილიონ გირვანქად რუსეთის ნაკრების ნახევარმცველი იური ჟირკოვი შეიძინეს, დანიელ სტარიჯის სანაცვლოდ "მანჩესტერ სიტის" 5 მილიონი გირვანქა გადაუხადეს, ხოლო "მიდლბროდან" მეკარე როს ტერნბული გადაიყვანეს. ბოლო პერიოდში აქტიურად მუსირებდა ხმები, რომ "ჩელსის" ანდრეა პირლოსა და ფრანკ რიბერის შეძენაც სურდა, მაგრამ ამ ფეხბურთელებმა საბოლოოდ, ლონდონში გადასვლას, თავიანთ კლუბებში დარჩენა არჩიეს. ანჩელოტის აზრით, მის განკარგულებაში საკმაოდ კარგად დაბალანსებული გუნდია, რომელიც გაძლიერებას აღარ საჭიროებს. ამასთან, იტალიელმა სპეციალისტმა ისიც განმარტა, რომ დეკუ და კარვალიუ, რომელთა გადაბირებას "ინტერი" ცდილობდა, "სტემფორდ ბრიჯზე" დარჩებიან. "სეზონის სტარტისთვის ჩვენ მზად ვართ. შემადგენლობა სრულად დავაკომპლექტე და ახალი ფეხბურთელების დამატებას აღარ ვაპირებ. ერთი პერიოდი, გუნდის ხელმძღვანელობა დეკუსა და კარვალიუს გასხვისებაზე მსჯელობდა, მაგრამ საბოლოოდ მათ გაყიდვაზე უარი ვთქვით. ამ ფეხბურთელების კლასი და გამოცდილება "ჩელსის" ძალიან წაადგება. კარვალიუ საოცრად ჭკვიანი მცველია, დეკუ კი უმაღლესი ტექნიკით გამოირჩევა. მოკლედ, ჩვენ დღევანდელ შემადგენლობას შევინარჩუნებთ. თუკი ვინმე აქ თავს არაკომფორტულად გრძნობს, გვითხრას და მაშინვე გავუშვებთ, მაგრამ ასეთი განცხადება ჯერ არც ერთ ფეხბურთელს არ გაუკეთებია", - ციტირებს ანჩელოტის Sky Sports-ი.
|