"ბოლტონის" მცველმა გარი კეჰილმა კლუბთან ახალი, 3-წლიანი კონტრაქტი გააფორმა. გასული სეზონის დასაწყისში 23 წლის მცველი "რიბოკ სტეიდიუმზე" ბირმინგემის "ასტონ ვილადან" გადაბარგდა. მან "ბოლტონის" შემადგენლობაში არაერთი შესანიშნავი მატჩი ჩაატარა და ივნისში ფაბიო კაპელომ ის ინგლისის ნაკრებშიც გამოიძახა. 

"ჩემი ხედვით, გარი - საუკეთესო ახალგაზრდა ცენტრალური მცველია ინგლისში. მან შესანიშნავი სეზონი ჩაატარა და ვიმედოვნებ ინგლისის ნაკრების ძირითად შემადგენლობაშიც მოხვდება" - აცხადებს "ბოლტონის" მთავარი მწვრთნელი გარი მეგსონი.

ამ ზაფხულს პრესამ რამდენჯერმე დაწერა იმის შესახებ, რომ კეჰილით ტოპ-კლუბები იყვნენ დაინტერესებულნი. მეგსონის განცხადებით, გარი "რიბოკ სტადიუმზე" ბედნიერია და ის კიდევ დაეხმარება "ბოლტონს", რომელიც შაბათს სეზონს გახსნის და "სანდერლენდის" წინააღმდეგ გამართავს შეხვედრას.

"გარი არა მხოლოდ შესანიშნავი ფეხბურთელია, ის შესანიშნავი პარტნიორიცაა. მე ბედნიერი ვარ, რომ მან თავისი მომავალი "ბოლტონს" დაუკავშირა" - აცხადებს მეგსონი