"მანჩესტერ იუნაიტედის" მთავარმა მწვრთნელმა ალექს ფერგიუსონმა ინგლისის სუპერთასის წაგებული შეხვედრის შემდეგ მსაჯობის დონით უკმაყოფილება გამოხატა.
იმ მომენტში, როცა ფრენკ ლამპარდმა "ჩელსის" მეორე გოლი გაიტანა, მოედნის ცენტრში ტრავმა პატრის ევრამ მიიღო და გაზონიდან ადგომა ვერ შეძლო. რეფერიმ თამაში არ გააჩერა, მიუხედავად იმისა, რომ ზუსტად ერთი წუთის წინ, როცა ანალოგიურ სიტუაციაში, თანაც საკუთარი საჯარიმოს სიახლოვეს ბალაკი წაიქცა, სასტვენით მანჩესტერის შეტევა ჩაშალა.
"ბალაკმა თავი მოგვაჩვენა, რომ ვითომდა სერიზოული ტრავმა მიიღო, მაგრამ სასტვენის შემდეგ მაშინვე წამოდგა და თამაშში ჩაერთო, ევრას შემთხვევაში კი სასტვენი დუმდა, არადა მსაჯმა ყველაფერი კარგად დაინახა. ფეხბურთელები ბალაკის მსგავს უმსგავსობას ხშირად მიმართავენ, ხოლო ის, დაისჯებიან თუ არა ისინი ამისთვის, მსაჯების პროფესიონალიზმზეა დამოკიდებული, რასაც ამ შემთხვევაში რეფერი აშკარად მოკლებული იყო".
"პირველი ტაიმი შესანიშნავად ჩავატარეთ, მაგრამ უამრავი სახიფათო მომენტიდან გოლად მხოლოდ ერთი ვაქციეთ. თამაშის ბოლოსაც ანგარიში დამსახურებულად გავათანაბრეთ, პენალტების სერიას რაც შეეხება, უბრალოდ ვიტყვი, რომ ის ჩვენი ძლიერი მხარე არასდროს ყოფილა".
|