პორტუგალიის ფეხბურთელთა ეროვნული ნაკრებისა და ლონდონის "ჩელსის" მცველმა რიკარდუ კარვალიუმ, უარყო გავრცელებული ინფორმაცია, რომ თითქოსდა მიმდინარე ზაფხულის სატრანსფერო პერიოდში კლუბის გამოცვლას გეგმავდა.
31 წლის ფეხბურთელი "არისტოკრატებს" 2004 წელს "პორტუდან" შეუერთდა და ინგლისის პრემიარლიგაში 100-ზე მეტი შეხვედრა ჩაატარა, კვირას გამართულ ინგლისის სუპერთასის მატჩში კი, "მანჩესტერ იუნაიტედს" გოლი გაუტანა. მიუხედავად წარმატებული კარიერისა, გასული სეზონი კარვალიუსთვის არცთუ კარგი გამოდგა და გაჩნდა ინფორმაცია, რომ მისი შეძენა რამდენიმე კლუბს სურდა. მათ შორის “ინტერი” აქტიურობდა, რომლის დამრიგებელ ჟოზე მოურინიოს ყოფილი შეგირდის წაყვანა მილანიში სურდა, თუმცა პორტუგალიელმა "სტემფორდ ბრიჯის" დატოვება არ ისურვა.
"რა თქმა უნდა, გუნდში ვრჩები. ახლა მთავარია, რომ თანაგუნდელებთან შევთამაშდე და ფორმა “ავკრიფო”. გასული წელი კატასტროფული იყო და კარიერაში ურთულესი პერიოდი მქონდა. თუმცა, წინ უნდა გავიხედო და თანაგუნდელებს მხარში ამოვუდგე" - განაცხადა კარვალიუმ.