მიუნხენის “ბაიერნის” მენეჯერმა ული ჰიონესმა განაცხადა, რომ მის კლუბს ლონდონის “ჩელსისგან” პორტუგალიის ნაკრების 26 წლის მარჯვენა მცველ ჟოზე ბოსინგვას შეძენის სურვილი ჯერაც არ განელებია.
“ჩვენ მისდამი ინტერესი არ დაგვიკარგავს, ვინაიდან ძლიერი, მაღალი დონის მცველი გვჭირდება” – აღნიშნა ჰიონესმა “ბილდთან” საუბარში.
“ჩვენ მხოლოდ ბოსინგვას გადაბირებას ვცდილობთ – ან მას ვყიდულობთ, ან არავის” – დასძინა მან.
ინფორმაცია ბოსინგვათი “ბაიერნის” დაინტერესების შესახებ ჯერ კიდევ ივნისის დასაწყისში გავრცელდა და, მართალია, “რეკორდმაისტერის” ხელმძღვანელობამ მას შემდეგ ცდა არ დააკლო, პორტუგალიელის დათმობაზე “არისტოკრატთა” დაყოლიება ვერ მოახერხა.
ახლა კი, როგორც ჰიონესი ამბობს, ვითარება “ბაიერნისთვის” სასიკეთოდ შეიცვალა.
“ჩელსიმ” გვაუწყა, რომ ამ თემაზე ინგლისის სუპერთასის შემდეგ დაგველაპარაკებოდა. ასე რომ ჩვენ მათ სიგნალს ველოდებით” – უთხრა მან ინგლისურ “დეილი ტელეგრაფს”.
გაზეთის ცნობით, “ჩელსი” ბოსინგვას სანაცვლოდ 15 მილიონ ევროს ითხოვს.
სხვაფრივ – “ტელეგრაფმა” ჰიონესს “სანის” მიერ გავრცელებული იმ ცნობის კომენტირებაც სთხოვა, რომლის მიხედვითაც, “ჩელსის” რუსი მფლობელი რომან აბრამოვიჩი თითქოს მზად არის, “ბაიერნს” ფრანკ რიბერის სანაცვლოდ 47 მილიონი ევრო შესთავაზოს.
“ეს მხოლოდ ერთი ფეხში?! – იხუმრა ჰიონესმა და შემდეგ სერიოზულად დაამატა – რიბერის გადასვლა-არაგადასვლის თემას წერტილი 15 ივლისს დავუსვით. მას შემდეგ ამ საკითხთან დაკავშირებით აღარანაირ წინადადებას არ განვიხილავთ. იმ შემთხვევაშიც კი, სულ რომ ჩინეთის იმპერატორი გვეახლოს.”