ბრაზილიელი სპეციალისტის ლუიშ ფელიპე სკოლარის დარი მიღწევებით თანამედროვე ფეხბურთში ცოტა თუ ვინმე დაიკვეხნის. საკლუბო დონეზე მან ორ გუნდთან ერთად მოიგო ლიბერტადორესის თასი, სანაკრებო დონეზე კი ჯერ ბრაზილიას მეხუთედ მოაპოვებინა მსოფლიოს ჩემპიონის ტიტული (2002), შემდეგ კი პორტუგალია ევროპის ჩემპიონატის ფინალში გაიყვანა (2004). გერმანიის მუნდიალის დასრულებიდან რამდენიმე თვეში სეუ ჟოზეს “ჩელსის” გაწვრთნა მიანდეს, თუმცა, რომან აბრამოვიჩის კლუბს დიდხანს ვერ შერჩა და გარკვეული პერიოდი უმუშევარი დარჩა. ორიოდე თვის წინ კი, სკოლარიმ მოულოდნელი გადაწყვეტილება მიიღო და უზბეკური “ბუნედკორის” გაძღოლას დაჰყაბულდა. ამბიციამოჭარბებულ ბრაზილიელს ტაშკენტშიც “საფეხბურთო მადა” არ გაჰქრობია – სპეციალისტს აზიის ჩემპიონთა თასის მოპოვება და გუნდის მსოფლიოს საკლუბო მუნდიალზე გაყვანა სურს.

- სეუ ფელიპაო, ბრაზილიისა და პორტუგალიის ნაკრებების, აგრეთვე, “ჩელსის” გაწვრთნის შემდეგ ყველასთვის მოულოდნელი გადაწყვეტილება მიიღეთ, როდესაც სადამრიგებლო მოღვაწეობის გაგრძელება უზბეკეთში გადაწყვიტეთ...
- ეს ჩემთვისაც მოულოდნელი წინადადება გახლდათ, მაგრამ რივალდო დამიკავშირდა, “ბუნედკორის” სათავეში ჩადგომა შემომთავაზა და მეც დავყაბულდი. რივალდო ხომ უზბეკეთში ჩემზე ადრე დაახლოებით ერთი წლით ადრე ჩავიდა, ამიტომაც მის რეკომენდაციას ვენდე. ამასთან, “ბუნედკორის” საკლუბო სისტემაზე გარკვეული წარმოდგენა მქონდა, მისი ხელმძღვანელების ამბიციამ კი მომხიბლა. მათ მეტად საინტერესო პროექტი გამაცნეს და მეც ინტერესით შევუდექი მუშაობას.
- რას გვეტყოდით უზბეკურ საფეხბურთო ლიგაზე?
- რივალდოს უზბეკეთში ჩასვლამდე ბუნდოვანი წარმოდგენაც არ მქონდა იქაურ ფეხბურთზე, სადღეისოდ კი გაცილებით გათვიცნობიერებული ვარ და საქმის კურსში თქვენც შემიძლია ჩაგაყენოთ... “ბუნედკორი” და “ფახთაქორი” სხვა გუნდებზე ერთი თავით მაღლა დგანან. საჩემპიონო ტიტულის მოპოვებასაც სწორედ ისინი ეცილებიან ერთმანეთს. თუკი უახლოეს პერიოდში ქვეყანაში კიდევ 2-3 ძლიერი გუნდი ჩამოყალიბდება, უზბეკური ფეხბურთი მნიშვნელოვანად წაიწევს წინ. აქ საკმაო რაოდენობის ახალგაზრდა ნიჭიერი ფეხბურთელები თამაშობენ და არც ისაა შემთხვევითი, უზბეკთა 20-წლამდელთა ნაკრებმა წელს ეგვიპტეში ჩასატარებელი მუნდიალის საგზური რომ მოიპოვა. ჩემი აზრით, 4-5 წელში აქაური ეროვნული ნაკრებიც მნიშვნელოვან წარმატებებს მიაღწევს. თუკი უზბეკები ევროპულ და სამხრეთამერიკულ ნაკრებებთან შეძლებისდაგავარად მეტი რაოდენობის ამხანაგურ მატჩებს ჩატარებენ, სულ მალე ისინი ანგარიშგასაწევ ძალად იქცევიან.
- რამდენად მაღალი ადგილი უკავია ფეხბურთს უზბეკეთის საზოგადოებრივ ცხოვრებაში?
- ქვეყანაში ჩამოსვლის პირველივე დღეებიდანვე მივხვდი და თვალნათლივ დავინახე, თუ როგორ უყვართ აქაურებს ფეხბურთი. უზბეკეთს ყველა წინაპირობა აქვს “საფეხბურთო ქვეყნად” რომ იქცეს. საამისოდ ერთი ნაბიჯი უკვე გადადგმულია. უკვე მოგახსენეთ, ქვეყნის ახალგაზრდული ნაკრები მსოფლიოს ჩემპიონატის დასკვნით ეტაპზე რომ მოხვდა. განას, ინგლისისა და ურუგვაის სახით უზბეკებს ჯგუფურ ეტაპზე ძალიან რთული მოწინააღმდეგეები შეხვდა, მაგრამ ნუ გაიკვირვებთ, თუკი გუნდი ფლეი-ოფშიც გააღწევს. გიმეორებთ, უზბეკურ ფეხბურთს წინ დიდი მომავალი აქვს. აქაური ჩინოვნიკები საქმეს მონდომებით უდგებიან და “ბუნედკორში” თავი კინაღამ სამუელ ეტოომ ამოჰყო. მასთან მოლაპარაკების თაობაზე დანამდვილებით ვერაფერს მოგახსენებთ, მაგრამ გაზეთები ამ ინფორმაციას ავრცელებდნენ.
- საბოლოოდ კამერუნელი ფორვარდი “ბარსელონადან” კი წავიდა, მაგრამ კურსი აზიისკენ არ აუღია. სხვა ვარსკვლავების გადაბირებაზე თუ არის საუბარი?
- ამ საკითხზე ვმუშაობთ და უახლოეს პერიოდში რამდენიმე ტრანსფერის განხორციელებასაც ვფიქრობთ. ჯერჯერობით გადაწყვეტილი არაფერია და დაველოდოთ მოვლენათა განვითარებას.
- რა სხვაობას ხედავთ ევროპულ, სამხრეთამერიკულ და აზიურ ფეხბურთს შორის?
- ევროპაში ყველაზე დიდი ყურადღება ტაქტიკური სქემების შემუშავებასა და მათ დანერგვას ეთმობა. სამხრეთ ამერიკაში ფეხბურთელები უფრო შემოქმედებით მხარეს აქცევენ ყურადღებას და აქედან გამომდინარე, მინდორზე იმპროვიზაციაც მეტია. მათ შორის დონეთა სხვაობაზე საუბარი აშკარად მიჭირს, თუმცა, იმის თქმა ნამდვილად შემიძლია, რომ ევროპელებიც და სამხრეთამერიკელებიც აზიელებზე შესამჩნევად წინ არიან. მსგავსებას რაც შეეხება, აზიელები თამაშის მანერით ლათინური ამერიკის წარმომადგენლებს ჰგავენ.
- უკანასკნელი 20 წლის განმავლობაში ფეხბურთი მნიშვნელოვნად შეიცვალა?
- თანამედროვე ფეხბურთში ბიზნესი სულ უფრო და უფრო დიდ როლს თამაშობს. სპორტის ამ სახეობას ბევრი ფულის საკეთებელ სფეროდ მიიჩნევს. აქედან გამომდინარე, მოთამაშეთა დენადობაც მაღალია და ხელფასებმაც ასტრონომიულ რიცხვებს მიაღწია. ისე კი ფეხბურთი საზოგადოებრივი ცხოვრების განუყრელი ნაწილია და მისი გამოცალკევებით განხილვა არ შეიძლება. მეცნიერება, ტექნოლოგიები და მარკეტინგი განუხრელად წინ მიდის და ფეხბურთიც მათ მხარს უბამს. ძალიან ამაღლდა სამწვრთნელო დონეც. სადღეისოდ, გუნდში დამრიგებლის როლი ერთი-ორადაა გაზრდილი.
- უახლოეს მომავალში ევროპაში დაბრუნებას ხომ არ აპირებთ?
- “ბუნედკორთან” 18-თვიანი ხელშეკრულება მაკავშირებს და “ბებერ კონტინენტზე” მინიმუმ ამ ვადის ამოწურვამდე ვერ მიხილავთ. შემდგომში შესაძლოა უზბეკებთან კონტრაქტი კიდევ გავაგრძელო... ერთი რამ დანამდვილებით შემიძლია მოგახსენოთ, ბრაზილიაში სამწვრთნელო კარიერის მიწურულს დავბრუნდები, რათა საბოლოო წერტილი დავუსვა ჩემს სამწვრთნელო საქმიანობას. ყველაფერი კი შესაძლოა ჩემი ერთ-ერთი შვილის გეგმამ შეცვალოს _ თუკი მან რომელიმე ევროპულ უნივერსიტეტში სწავლა მოიწადინა, იძულებული გავხდები აზია დავტოვო.
- მომავალ მსოფლიოს ჩემპიონატზე რომელიმე ეროვნული ნაკრების მთავარი მწვრთნელის რანგში თქვენი ხილვა გამორიცხულია?
- სამხრეთ აფრიკის მუნდიალი ჩემს გეგმაში არ შედის.
- ხომ ვერ დაგვისახელებდით სადღეისოდ ყველაზე ძლიერ ნაკრებსა და კლუბს?
- როგორც ბრაზილიელი, თავს ვალდებულადაც კი მივიჩნევ, ეროვნულ ნაკრებებში ყველაზე ძლიერად ბრაზილია ჩავთვალო. მიკერძოებულ პასუხად ნუ ჩამითვლით _ ჩემი აზრით, მართლაც ასეა. კლუბებს რაც შეეხება, “ბარსელონა” ყველაზე სოლიდურად და მიმზიდველად თამაშობს.
- სამომავლო მიზნებს ხომ ვერ გაგვიმხელდით?
- ყოველთვის მაქსიმალისტი ვიყავი და ჩემს გუნდებს შეძლებისდაგვარად საუკეთესო შედეგის მიღწევას ვუსახავ. იგივე ვრცელდება “ბუნედკორზეც”. უზბეკურ გუნდთან ერთად ყველაფრის მოგება მსურს, უპირველესად კი აზიის ჩემპიონთა ლიგის.